شعری ترکی از آقای اوجی شاعر قباق تپه ای

شمعین دولانیر باشینا پروانه یالاندان

ایستر یاناشیب سئوگیسینه یانه یالاندان

زهریله داشیردیر کوزه نی ساخسی چاناقی

اوستونده یازار ساغر میخانه یالاندان

گیزلینده سویوشلر ساییری قانشار اولاندا

قوربان الیری جانینی جانانه یالاندان

بوغدانی ووروب انبارا قالسین باهالاشسین

آرپانی توکر کوهنه دگیرمانه یالاندان

خالقین باشینا بورکی قویوب گئتمه گه خاطر

کور کهریزی اوخشادیری عمّانه یالاندان

ایشلر گورر اوز باشینا حیوانه یاراشماز

نسبت وئرر اوز فعلینی انسانه یالاندان

تا بیرده قوناق اولماسین اوردا باجی قارداش

اوز منزیلینی ایلیری ویرانه یالاندان

تا سهمینی چوخلاشدیرا بازار دغلدن

هر یانه قاچان حالدا وورار چانه یالاندن

ایشلر گوروری دنیادا ایبلیس گوره بیلمز

لعنتده وئرر مین کره شیطانه یالاندان

ایستر اوزونی گوستره دوسلارینا مظلوم

گاهدان قورو گوورانی بویار قانه یالاندن

هر یئر ده قوناق اولسا ییر قارنی داشینجا

سوولر بویورون منزیله مهمانه یالاندان

مظلوم آداما دیش باتیریر گوژلونو گورجک

یاغلار دیلینی مین بلی قوربانه یالاندان

قانشار دوروب انسانیله سوز دانیشابیلمز  

گیزلینده دیه ر مین جوره افسانه یالاندان

تا قونشو قووم آللانا سوزباشین آچاندا

اورگنجک اولوب آندایچه قرآنه یالاندان

گئتمز آناسی آتاسینین حالینی بیلسین

باشین قال ایلر چاییا قلیانه یالاندان

ایلدن ایله قارداش باجی دیدارینا گئتمز

گاهدان سورونور تبریزه تهرانه یالاندان

گرچک سوزو هئچ کیمدن اینانماز اشیدنده

تهمتده وورار قیزلارا اوغلانه یالاندان

گیزلین دانیشیر چنگه دوتار دالدا بوجاخدا

اوخشادیر اوزون رستم دستانه یالاندان

ازبس کی یالاندان قییدیب دوز یولا گئتمز

اوجی گتیریر آدینی دیوانه یالاندان

/ 0 نظر / 19 بازدید